0
ԷԴԻԼՅԱՆ ԳՈՒՐԳԵՆ ՄԵՍՐՈՊԻ /25.12.1885 թ., Իջևան - 18.01.1942 թ., Օմսկ, խորհրդային բռնատիրության զոհ/: Փիլիսոփայական գիտությունների դոկտոր /1909/, պրոֆեսոր /1934/: Սովորել է գյուղի թեմական դպրոցում: 1896 թ-ին ավարտել է Թիֆլիսի Ներսիսյան դպրոցը, 1903 թ-ին` Էջմիածնի Գևորգյան ճեմարանը: 1904-1909 թթ-ին սովորել է Ենայի և Լայպցիգի /Գերմանիա/, Բեռնի /Շվեյցարիա/ համալսարաններում: 1909 թ-ին պաշտպանել է դոկտորական ատենախոսություն: 1909-1914 թթ-ին աշխատել է Գևորգյան ճեմարանում, 1914-1919 թթ-ին` Թիֆլիսի Ներսիսյան դպրոցում: 1920 թ-ին հրավիրվել է ԵՊՀ և 1921 թ-ին նշանակվել նորաբաց մանկավարժական ֆակուլտետի դեկան: 1934-1937 թթ-ին աշխատել է Հայկական մանկավարժական ինստիտուտում /ներկայումս` Խաչատուր Աբովյանի անվան ՀՊՄՀ/: Գործունեությունն ընդհատվել է 1937 թ-ին: Մահացել է աքսորավայրում: Հետմահու արդարացվել է: Հրատարակել է 100-ից ավելի գիտական հոդված: Տպագրել է ,,Քննադատություն Ցիլլերի ձևական աստիճանների,, /Վաղարշապատ, 1912/, ,,Դասավանդման ձևեր,, /Վաղարշապատ, 1913/, ,,Հայոց լեզվի մեթոդիկա,, /Թիֆլիս, 1923/, ,,Ձեռագրի ուսուցման մեթոդիկա,, /Ե., 1927/, ,,Լեզվի մեթոդիկա,, /Ե., 1930/, ,,Հոգեբանության ուրվագծեր,, /Ե., 1958/ աշխատությունները:
|