Խաչատուր Աբովյանի անվան հայկական պետական մանկավարժական համալսարան
1922թ. նոյեմբերի 7-ին հիմնադրվել է Մանկավարժական ինստիտուտը, որը
1948թ.-ից կոչվել է մեծ լուսավորիչ ու մանկավարժ Խաչատուր Աբովյանի
անունով: Հիմնադրման առաջին տարում ինստիտուտն ուներ 3 ֆակուլտետ, մի քանի տասնյակ ուսանողներ և դասախոսներ: 1923թ. բուհը տվել է եռամյա կրթությամբ առաջին շրջանավարտները:
Հետագա տարիներին ինստիտուտը մի քանի անգամ միացվել է համալսարանին,
առանձնացվել, վերակառուցվել, ենթարկվել բովանդակային փոփոխությունների:
1932-33 ուստարում ինստիտուտն ուներ 5 ֆակուլտետ: Երկրորդ համաշխարհային
պատերազմի նախօրյակին բացվեցին նոր ֆակուլտետներ, հեռակա և երեկոյան
բաժիններ: 1944-45 ուստարում վերաբացվեց բնագիտական ֆակուլտետը: 1946-47 ուստարում ինստիտուտի վեց ֆակուլտետներում սովորում էր 1034 ուսանող: 1948-49 ուստարում կրթօջախում բացվեց նոր` հոգեբանության-տրամաբանության ֆակուլտետը, որը գործեց մինչև 1955-56 ուստարին:
1956թ. ինստիտուտում ստեղծվեցին նոր բաժիններ, վերակառուցվեց
հոգեբանության ֆակուլտետը, հիմնադրվեց մանկավարժության ֆակուլտետը`
դպրոցական և նախադպրոցական բաժիններով, ստեղծվեցին փայտամշակման,
մետաղամշակման արհեստանոցներ և ավտոմեքենաների ու գյուղգործիքների
լաբորատորիա: 1957թ. բուհին կից ստեղծվեց հոգեբանության պրոբլեմային լաբորատորիան:
Այսօր համալսարանն ունի 10 ֆակուլտետ, 50-ից ավելի ամբիոններ: Գիտական
առաջընթացին համաքայլ` համալսարանը մասնագետներ է պատրաստում ոչ միայն
Հայաստանի Հանրապետության, այլև Արցախի և սփյուռքի հայ կրթօջախների համար:
http://www.yerevan.am/main.php?lang=1&page_id=308
|