ՀայազնուհիՀՊՄՀ ուսանողուհի...Ես կարծեցի, որ գտել եմ, բայց թե ինչպես կորցրեցի՝ չհասկացա,
Ես կարծեցի, որ տիրել եմ, բայց կարծես թե մոլորվել եմ՝ չհասկացա:
Ամենուրեք քո բույրն առնում, քեզ արթմնի երազում եմ,
Քո պատկերը հոգուս խորքում ինձ հնամյա քուրմ է թվում:
Ինչ պատահեց՝ չհասկացա, ինչու այդքան շուտ մոռացար,
Մենակ էինք մենք խորանում, ինչ պատահեց, որ հեռացար:
Սեր ծնեցիր մութ գիշերում, երկունքիս ցավը մոռացար,
Սեր տվեցիր անծայրածիր, բայց շատ ափսոս՝ չհասկացար...
***
Երջանկություն, ուրվականի պես եկար
Մորմոքեցիր խոցված հոգիս ու անցար,
Սիրուց խոցված հոգուս անդորրը
Հրդեհեցիր, բռնկեցիր ու անցար:
Ինձ այդ պահը հավերժություն էր թվում,
Օ, Սադայել կրկին խաբել կամեցար,
Ինչ էլ լինի սիրուդ զոհն եմ մեհյանում,
Բագինն ինչու օտարեցիր ու անցար...
***
Գիշերային կախարդական մենություն
Անկարող եմ քո հմայքին դիմանալ,
Սեր, խոստումնալից լռությամբ
Փոթորկեցիր ու աննկատ հեռացար:
Ես չգիտեմ այն պարգև էր ի վերուստ,
Թե սոսկ պատրանք, ցանկություն,
Տաք նենգությամբ բարուրված
Ինձ գրկեցիր, շոյեցիր ու հեռացար:
Չհասկացա ինչ պատահեց ու ինչպես,
Ափսոսանք չէ, որ զգում եմ ես հիմա
Երազանքս մի վայրկյանում կատարվեց,
Բայց փափագս անկատար էլ կմնա...
