«ՄԱՅԻՍՅԱՆ ՀԱՂԹԱՆԱԿՆԵՐ»
Խաչատուր Աբովյանի անվան հայկական պետական մանկավարժական համալսարանի գիտական գրադարանում բացվել է «Մայիսյան հաղթանակներ» նոր ցուցադրությունը:
Ցուցադրության են դրվել Հայաստանում, Արցախում և այլուր տպագրված ավելի քան 130 հայերեն, ռուսերեն, անգլերեն լեզուներով գիտական հանրագիտարաններ, մենագրություններ, գեղարվեստական գրքեր:
Ներկայացված են 1918 թ-ի մայիսին Սարդարապատում, Ապարանում, Վանաձորում հայ ժողովրդի տարած հաղթանակների մասին պատմող գրքեր:
Թեմատիկ դարակով ներկայացված են Երկրորդ համաշխարհային պատերազմին հայ ժողավրդի մասնակցությունը պատկերող գրքերը:
Այստեղ առաջնային են մարշալ Հովհաննես Բաղրամյանի հեղինակած և նրա, ինչպես նաև մարշալներ Համազասպ Բաբաջանյանի, Արմենակ Խանֆերյանցի, Խորհրդային Միության ծովակալ-մարշալ Հովհաննես Իսակովի մասին գրքերը: Գեներալ Աշոտ Ղազարյանի գրքերը պատմում են հայ ականավոր զորահրամանատարների մասին: Ներկայացված են պատերազմի մասնակից Հայաստանի ուսուցիչների մասին գրված հատորները:
Մի քանի տասնյակից ավելի գրքեր ներկայացնում են Արցախյան ազատամարտն ու հայ ժողովրդի տարած հաղթանակը, որի արդյունքում այսօր ունենք Հայաստանի նորոգ պետականությունը: Այս բաժնում ներկայացված են Արցախյան ազատամարտի մասին պատմող հանրագիտարանը, Հայաստանում և Արցախում տպագրված հերոսամարտի հերոս-զոհերի մասին պատմող հանրագիտարանները, հերոսամարտի մասնակիցներին նվիրված գրքերը, հուշերը:
Աննա ՄԱՐՏԻՐՈՍՅԱՆ
Գիտական գրադարանի ավագ մատենագետ |
