«ՀԱՅՈՑ ՑԵՂԱՍՊԱՆՈՒԹՅՈՒՆ. 1915 ...».
ՈԳԵԿՈՉՄԱՆ ՑՈՒՑԱԴՐՈՒԹՅՈՒՆ

Խաչատուր Աբովյանի անվան հայկական պետական մանկավարժական համալսարանի գիտական գրադարանում Հայոց ցեղասպանության 99-ամյակին ընդառաջ բացվել է «Հայոց ցեղասպանություն. 1915 ...» ոգեկոչման ցուցադրություն:
Ցուցադրության են դրվել Հայաստանում և այլուր տպագրված ավելի քան 150 հայերեն, ռուսերեն, անգլերեն լեզուներով գիտական մենագրություններ, գեղարվեստական գրքեր, վկայություններ, հուշեր, թերթեր:
Թեմատիկ դարակով ներկայացված են պատմաբան Ստեփան Պողոսյանի Ցեղասպանության թեմային վերաբերող «Հայոց Ցեղասպանության պատմություն» գրքի երեք հատորները, «Թուրքերը թուրքերի մասին» գրքի չորս հատորները /չորրորդ հատորը անգլերեն ամփոփում է/, «Հարևաններ մոտ և հեռու» գրքի երեք հատորները, «Հայկական հարցի և հայոց ցեղասպանության պատմություն», «Սասունցիներ», «Ինձ բահ տվեք» և այլ գրքեր:
Առանձին ցուցադրվել են Հայոց Ցեղասպանությունը դատապարտած երկրների մասին հայերեն և այլալեզու գրքեր, Ցեղասպանությունը վերապրած մարդկանց վկայություններ, հուշեր, այլ պետությունների դիվանագիտական ծառայությունների վկայագրեր:
Ներկայացված են Ցեղասպանության ժամանակակից մեծ մարդասերների ծառայությունները ներկայացնող գրքեր:
Ներկայացված են Ցեղասպանության շարունակություն կազմող 1988 թ-ին ակսված Ազգային ազատագրական շարժմանը հաջորդած Սումգայիթում, Բաքվում իրագործված ջարդերի մասին գրքեր և Քեսաբից հայ բնիկ բնակչության տեղահանման մասին պատմող թերթային հոդվածներ:

Աննա ՄԱՐՏԻՐՈՍՅԱՆ
Գիտական գրադարանի ավագ մատենագետ