28.03. 2011 թ.

  Այս օրերին ամփոփուեցին «Սփիւռք» Գիտաուսումնական Կենտրոնում Համաստեղի ստեղծագործութիւնների հիման վրայ յայտարարուած միջազգային մրցոյթի արդիւնքները, որ հովանաւորել էին արձակագիր Արամ Սեփեթճեանը (Լիբանան) եւ բանաստեղծ Մանուէլ Ադամեանը (Մեծ Բրիտանիա): Եզրափակիչ փուլ հասած 10 աշխատանքները ըստ պարտադիր ծրագրի ներկայացնում էին «Աղջի Եղսիկ» եւ «Աստղկան սայլը» պատմուածքները: Մրցոյթն անցկացւում էր Խ. Աբովեանի ան. ՀՊՄՀ բանասիրական 4-րդ լսարանի ուսանողների միջեւ:
  Արդիւնքներն այսպիսին էին. յանձնախումբը, որը գլխաւորում էր Պրօֆ. Սուրէն Դանիէլեանը, որոշեց այս անգամ առաջին մրցանակ չշնորհել: Երկրորդ մրցանակի արժանացաւ Լիլիթ Ալեքսանեանը (Սիւնիքի մարզ, Քաջարան), երրորդ մրցանակ շնորհուեց երկու ուսանողների` Նարինէ Յարութիւնեանին (Արագածոտնի մարզ, գիւղ Վարդենուտ) եւ Քրիստինէ Մանուկեանին (Կոտայքի մարզ, Արայ գիւղ): Ստեղծագործական մրցանակի տիրացաւ Նարինէ Ղուկասեանը` գեղարուեստական բարձր տեսողութեան համար:
  Փակման հանդիսութիւնը կայացաւ Մարտի 28-ին: Բոլոր ուսանողներին տրուեցին յուշանուէրներ: Նրանց քաջալերողների թւում էին հայրենի բանաստեղծ Մերուժանը, որի «Մելամաղձ» նորերս հրատարակուած քերթողական ժողովածուն, հակառակ խորագրի, լուսաւորեց բոլոր մասնակիցներին: Ուսանողներին տրուեցին Արամ Սեփեթճեանի «Տագնապը բանաստեղծութեան ընդմէջէն» վերլուծական գիրքը: Մանուէլ Ադամեանը եւս լրացուցիչ մրցանակ էր շնորհել առաջին բնագիծ նուաճած ուսանողի համար: Մի շարք ուսանողներ «Սփիւռք» Գիտաուսումնական Կենտրոնից ստացան արժէքաւոր նուէրներ:
  Միջոցառումը վարում էր Կենտրոնի տնօրէն, սփիւռքահայ գրականութեան դասախօս Պրօֆ. Սուրէն Դանիէլեանը, ով գնահատեց ուսանողների աշխատանքը` միաժամանակ ընդգծելով այն դժուարութիւնները, որ յաղթահարում են նրանք` արեւմտահայ հեղինակների լեզուական եւ գեղարուեստական համակարգերի իւրացման ճանապարհին: Դասախօսը միաժամանակ հպարտանում է իր սաներով, որոնց մէջ տեսնում է շնորհակալ այս գործի շարունակականութիւնը:
  Համալսարանի ուսումնական գծով պրօռեկտոր, Պրօֆ. Մեժլում Երիցեանը բարձր գնահատեց այն քայլերը, որոնք բերելու են արեւմտահայ մշակոյթի իւրացմանը Հայաստանում, իսկ այդ առումով մեծ պատասխանատուութիւն է ընկնում ուսանողների ուսերին: Նա փոխանցեց նաեւ Համալսարանի ռեկտոր, Պրօֆ. Ռուբէն Միրզախանեանի ողջոյնի խօսքը: ԵՊՀ գրականութեան դասախօս, Պրօֆ. Սերժ Սրապիօնեանը բարի նախանձով եւ միաժամանակ հպարտութեամբ է նայում մանկավարժականցիներին: Մշակութային ճանաչողութիւնը սկսւում է դպրոցից, իսկ ուսուցիչներ հիմնականում այստեղի շրջանաւարտներն են դառնում:   Միջոցառմանը ներկայ էր նաեւ մրցութային յանձնախմբի անդամ Մարօ Խաչատրեանը:
Ուսանողներից ելոյթ ունեցան Լիլիթ Ալեքսանեանը, Սիրարփի Գէորգեանը, Նարինէ Յարութիւնեանը, ովքեր սրտաբուխ շնորհակալութիւն յայտնեցին ե՛ւ հովանաւորներին, ե՛ւ «Սփիւռք» Գիտաուսումնական Կենտրոնին, ե՛ւ համալսարանի ղեկավարութեանը: Հանդիսութեան աւարտին մասնակիցների համար բացուեց սիրոյ սեղան:
  Նշենք, որ «Սփիւռք» Գիտաուսումնական Կենտրոնում մրցոյթն աւանդական է: Այն իրականացւում է 2000-ից ի վեր: