ԱՇԽԱՐՀԸ` ՄԻ ՓՈՔՐԻԿ ՓՈՂՈՑ Խաչատուր
Աբովյանի անվան հայկական պետական մանկավարժական համալսարանի օտար
լեզուների ֆակուլտետի մասնագիտական ուսուցման ամբիոնը սեպտեմբերի 28-ին
կազմակերպել էր «Լեզուների երկխոսություն» խորագրով միջոցառում` նվիրված
եվրոպական երկրների միջազգային օրվան: Միջոցառմանը
հրավիրված էին Հայաստանում հավատարմագրված դիվանագիտական կորպուսի
ներկայացուցիչներ. Ֆրանսիական դեսպանության լեզվական եւ մշակութային գծով
կցորդ Ֆաբիեն Նեիրան, մշակութային բաժնից` Մոնիկ Մարտենը, Գերմանիայի
դեսպանատան կրթական ծրագրերի պատասխանատու Թինե Լաուֆերը, Ռումինիայի
ներկայացուցիչ Քրինա Պրոնարիուն, Բրազիլիայի դեսպանատան մշակութային բաժնի
պատասխանատուն եւ օտար լեզվի թեքումներով դպրոցների ներկայացուցիչներ: Հանդիսավարները
տարբեր լեզուներով ողջունեցին ներկաներին: Ապա ուսանողները տարբեր
լեզուներով ներկայացրին աստվածաշնչյան ավանդազրույցը լեզուների ստեղծման
մասին ու հավելեցին. «Այնտեղ, որտեղ տարբեր լեզուներով մարդիկ չեն կարող
հաղորդակցվել, հաղորդակցվել են մշակույթի միջոցով, որը սահմաններ ու լեզու
չի ճանաչում»: Ուսանողները էստրադային եւ դասական ժանրի երգերով ներկաներին մատուցեցին իսպանական, ֆրանսիական եւ գերմանական մշակույթ: Միջոցառումն
ամփոփվեց Եղիշե Չարենցի խոսքով. «Աշխարհը կդառնա մի փոքրիկ փողոց» հանուր
մարդկության համար: Չարենցի մարգարեությունը մեր ժամանակների համար էր.
երկրագնդի մեծ քարտեզի վրա կարեւորը մարդն է, իսկ մշակույթները`
զգացողությունների եւ մերձեցման լավագույն միջոց: |