«Զանգակ-97» հրատարակչութիւնը
լոյս է ընծայել Սուրէն Դանիէլեանի «Միջուկի տրոհումը» /Սփիւռքահայ
գրականութեան պատմութիւն. Ներածութիւն/ մենագրութիւնը:
Այս գիրքը, որ
առաջինն է նախատեսուած երեք հատորներից, ներկայացնում է սփիւռքահայ եւ մայր
գրականութիւնների առընչութիւնները, տեսաբանական որոնումները,
զարգացումները` օրինաչափութիւնների եւ անակնկալի շաղախով: Այն ունի երկու
բաժին: Առաջինը քննում է հայ գրականութեան ակունքների, Մշակութային եւ
նիւթական Հայաստանի համակարգի հետ ուղղակի եւ անուղղակի կապերը, երկրորդ
բաժնում օտարագիր գրականութեան համայնապատկերն է, որտեղ առաջնային են
դարձել ոչ միայն համաշխարհային մեծութեան հասած ծագումով հայ դէմքերը,
այլեւ բուն օտարագիր գրականութեան ներքին տարածքի ծաւալումները: Հեղինակը
փորձում է սթափ մօտենալ բուն հարցադրումներին. օտարագիրը հայ գրականութիւն
չէ, սակայն ներկայացնում է ազգային գրական արմատական շահագրգռութիւններ: Նա
ինքն է ձգւում դէպի ազգային պորտալար: Օտարագիր գրականութեան հիմնահարցերի
կողքին մեր լաւագոյն հեղինակների համահաւաք դիմաստուերներն են` դասական
աւանդոյթի սկզբունքով կազմուած:
Գրքի հրատարակութիւնը հովանաւորել են
երջանկայիշատակ Յովսէփ Եուսէֆեանը (Պուէնոս Այրէս, Արգենտինա), «Շէն»
կազմակերպութեան ղեկավար Հրայր Հրաչեանը (Փարիզ, Ֆրանսիա) եւ ՀՀ ԳԱԱ
ակադեմիկոս Ժակ Փանոսեանը (Փարիզ, Ֆրանսիա): Գիտական խմբագիրը «Սփիւռք»
Գիտաուսումնական Կենտրոնի մեթոդիստ Քնարիկ Աբրահամեանն է: