Հյուր էին դպրոցականները
ԱՐԴԵՆ ԸՆՏՐԵԼ ԵՆ ԱՊԱԳԱ ՄԱՍՆԱԳԻՏՈՒԹՅՈՒՆԸ
Խաչատուր Աբովյանի անվան Մանկավարժական համալսարանի սկզբնական կրթության ֆակուլտետում հյուրընկալել էին Երևանի Հովհաննես Իսակովի անվան թիվ 132 դպրոցի 8-րդ ՛՛գ՛՛ դասարանի աշակերտներին և ուսուցիչներին: Ֆակուլտետին ծանոթացնելուց հետո ասիստենտ Անահիտ Բաբաջանյանը նրանց ուղեկցեց գիտական գրադարան:
Գրադարանի տնօրեն Տիգրան ՊետրոսՅանցը աշակերտներին ընդունեց հումանիտար գրականության փոքր սրահում: Նա խոսեց յուրաքանչյուր աշակերտի հետ, ճշտեց յուրաքանչյուրի նախասիրությունը, փորձեց պարզել թե ապագայում նրանցից ով իրեն որտեղ են տեսնում: Պարզվեց, որ աշակերտները հիմնականում ընտրել են ապագա մասնագիտությունը: Աշակերտներից մեկն ասաց, որ ուզում է հոգեբան դառնալ և սովորելու է Մանկավարժական համալսարանի համապատասխան ֆակուլտետում:
Տնօրենը խոսեց ընթերցանության, գրքի մասին, ինքնակրթության բազմակողմանի օգուտների մասին, ինչը մարդուն դարձնում է բազմակողմանի զարգացած և կյանքի ցանկացած փոփոխություններին պատրաստ: Նա բոլոր դպրոցականներին և դպրոցի գրադարանին նվիրեց մեր երկրի սահմանադրության վերաբերյալ գիրք:
Մեծ ընթերցասրահում աշակերտները ծանոթացան մեծ հայագետ, եկեղեցական գործիչ, Կիլիկիո Հայոց կաթողիկոս Գարեգին Հովսեփյանցի գրքերի ցուցադրությանը:
Լուսանկարը՝ Աննա Մարտիրոսյանի |
