Հայկական մանկավարժական և Սոֆիայի համալսարանները համագործակցության մասին համաձայնագիր են ստորագրել
04.04.2012
ՀՀ վարչապետ Տիգրան Սարգսյանի և Բուլղարիայի վարչապետ Բոյկո
Բորիսովի ներկայությամբ Խաչատուր Աբովյանի անվան հայկական պետական
մանկավարժական համալսարանը և Բուլղարիայի լավագագույն բուհը՝ Սոֆիայի
Սբ.Կլիմենտ Օրխիդսկու անվան համալսարանը հինգ տարվա ժամկետով
համագործակցության հուշագիր ստորագրեցին:
«Մեր երկրների
բուհերի միջև լավ հին կապեր են հաստատված:Արդեն երկար տարիներ
համալսարանում ներառված է «հայագիտություն» առարկան»,- երեքշաբթի ՀՀ
վարչապետ Տիգրան Սարգսյանի հետ համատեղ մամուլի ասուլիսի ժամանակ ասաց
Բուլղարիայի վարչապետ Բոյկո Բորիսովը:
Բացի այդ, Բորիսովը
նշեց, որ հինգ տարվա ընթացքում համալսարանական հրատարակչությունում
բուլղարերեն լեզվով հրատարակվել է Հայաստանի պատմության մասին
երեքհատորանոց գիրքը:
«Համաձայնագիրն առաջիկա հինգ տարիների
ընթացքում բուհերի միջև համագործակցություն է նախատեսում»,-ասաց
մանկավարժական համալսարանի ռեկտոր Ռուբեն Միրզախանյանը:
Նա
նշեց, որ այդ ժամանակահատվածում նախատեսվում է համատեղ գիտաժողովների
անցկացում, ուսանողների, դասախոսների և ադմինիստրատիվ աշխատողների
փոխանակություն, համատեղ հետազոտությունների կատարում, ուսումնական
ծրագրերի իրականացում ըստ աշխատանքային ծրագրում նշված առարկաների,
վկայագրերի փոխադարձ ձանաչում:
Համագործակցությունը կլինի
կրթության, գիտական և ուսումնամանկավարժական գործունեության ոլորտներում`
ժամանակակից տեխնոլոգիաների բոլոր հնարավորությունների և միջոցների
կիրառմամբ:
Հայկական մանկավարժական համալսարանի ռեկտորը
չբացառեց ստորագրված համաձայնագրի շրջանակներում Հայաստանում Բուլղարիայի
պատմությանը վերաբերող գիտահետազոտությունների անցկացումը:
Խաչատուր Աբովյանի անվան հայկական պետական մանկավարժական համալսարանը հիմնադրվել է 1922թ-ին:
Սոֆիայի
համալսարանը, որը կրում է սլավոնական գրի հիմնադիրներից մեկի՝ Սբ. Կլիմենտ
Օրխիդսկու անունը, Բուլղարիայի ավագագույն բուհերից է և հիմնադրվել է
1888թ-ին:
Սոֆիայի Սբ.Կլիմենտ Օրխիդսկու անվան համալսարանի ներկայիս ռեկտորը պատմական գիտությունների դոկտոր, 13 գրքերի հեղինակ Իվան Իլչևն է:Ի
դեպ, հետաքրքիր համընկնումով համաձայնագիրը կնքած երկու ռեկտորներն ունեն
մի շարք նմանություններ: Նրանք երկուսն էլ պատմական գիտությունների դոկտոր
են, յուրաքանչյուրն իր երկրում ավարտել է նույն համարը կրող` 114
անգլիական թեքումով դպրոցը, և մինչև ռեկտոր ընտրվելը եղել են նույն
համալսարաններում ֆակուլտետի դեկաններ, երկուսի հայրերն էլ աշխատել են
նույն բուհերում, և մասնագիտությամբ պատմաբաններ են:
|