Բուհի պատմությունն ու տարեգրությունը`
եռալեզու ալբոմում
13.09.2012
Խաչատուր Աբովյանի անվան հայկական պետական մանկավարժական
համալսարանի հիմնադրման 90-ամյա հոբելյանի շրջանակում շարունակվում են
կազմակերպվել տարաբնույթ միջոցառումներ, գիտական կոնֆերանսներ: Այդ
առթիվ գիտական և հետբուհական աշխատանքների գծով պրոռեկտոր, իրավաբանական
գիտությունների թեկնածու, դոցենտ Արա Երեմյանը տեղեկացրեց, որ համալսարանի
պրոֆեսորադասախոսական կազմի ջանքերով առաջիկայում նախատեսվում է
հրատարակել համալսարանի պատկերազարդ ալբոմը: Եռալեզու`
հայերեն, ռուսերեն և անգլերեն տարբերակներով ալբոմը նպատակ ունի
համալսարանի մանկավարժական ժառանգությունը դարձնել սերունդների
սեփականությունը, ներկայացնել բուհի պատմության բոլոր շրջանները`
հիմնադրումը, զարգացման փուլերը, անցած ճանապարհը, ներկան և հեռապատկերը: Ալբոմը
կներառի հայ գրի ստեղծումը, միջնադարյան Հայաստանում նշանավոր դպրոցների
և վանական համալսարանների կազմակերպումը, Մանկավարժական համալսարանի
հիմնադրումը, բուհի առաջին տարիները, ինչպես նաև համալսարանի
մասնակցությունը Հայրենական Մեծ պատերազմին և Արցախյան հերոսամարտին: «Ալբոմը
սկսել ենք գրերի գյուտից, քանի որ այն մեր ժողովրդի համար ամենակարևոր
պատմական անցքերից է. դրանից է սկիզբ առել մանկավարժությունը: Պատմական
այդ կարևոր իրողությունն աննկատ չէր կարող մնալ մանկավարժական բուհի
կողմից: Ալբոմը բավականին պատկերազարդ է, այն ամբողջությամբ պատրաստ կլինի
համալսարանի 90-ամյակին նվիրված մեծ միջոցառման ժամանակ»,-նշեց Արա
Երեմյանը: Ընթերցողը ալբոմի միջոցով
հնարավորություն կունենա ծանոթանալ նաև Մանկավարժական համալսարանի
գործունեությանը `սկսած 1990 թվականից մինչև մեր օրերը:
| 
