Մաթևոսյանական տարվա շրջանակներում Խաչատուր Աբովյանի անվան ՀՊՄՀ բանասիրական ֆակուլտետի, հայ գրականության ամբիոնի և ,,Սփյուռք,, գիտաուսումնական կենտրոնի նախաձեռնությամբ համալսարանի ,,Սփյուռք,, գիտաուսումնական կենտրոնում անցկացվեց համալսարանի շրջանավարտ Հրանտ Մաթևոսյանի 75-ամյակին նվիրված գիտական նստաշրջան, իսկ բանասիրական ֆակուլտետում մեկ լսարան կոչվեց Հրանտ Մաթևոսյանի անունով: Արարողությանը մասնակցում էին համալսարանի ռեկտորի պաշտոնակատար Ռուբեն Միրզախանյանը, ՀԳՄ նախագահ Լևոն Անանյանը, ,,Նորք,, ամսագրի խմբագիր Ֆելիքս Մելոյանը, Հրանտ Մաթևոսյանի կինը` տիկին Վերժինեն, հարազատներ, դասախոսներ, ուսանողներ և հյուրեր:
     ,,Հայրենի հողը Մաթևոսյանը դիտարկում էր որպես սերունդների շարունակականության գաղափար, և նրա փիլիսոփայությունը բոլոր ժամանակների համար է,,,- ասաց Ռուբեն Միրզախանյանը` փաստելով, որ ցանկացած համալսարանի վարկը պայմանավորված է ոչ թե լավագույն պայմանների ու հնարավորությունների առկայությամբ, այլև նրանով, թե ովքեր են շրջանավարտները և ովքեր են դասավանդում: Նա հրապարակեց համալսարանի գիտխորհրդի որոշումը, որով սահմանվել է Հրանտ Մաթևոսյանի անվան կրթաթոշակ և որին արժանացել է բանասիրական ֆակուլտետի ուսանողուհի Սիրարփի Սուրենի Գևորգյանը:
     ՀԳՄ նախագահ Լևոն Անանյանը խոսեց մաթևոսյանական ավանդների, ժողովրդական ճանաչման և ստեղծած դպրոցի մասին, որից սնունդ են առնում ոչ միայն հայրենիքում, այլև նրանից դուրս: Եվ հատկանշական է մաթևոսյանական տարում մեծ գրողի վերադարձը հարազատ համալսարան:
     Նստաշրջանում զեկուցումներով հանդես եկան պրոֆեսոր Ա.Դոլուխանյանը, բանասիրական գիտությունների թեկնածու, դոցենռ Ռ.Դոլուխանյանը, բանասիրական գիտությունների թեկնածու, դոցենտ Մ.Գիլավյանը և բանասիրական գիտությունների թեկնածու, ասիստենտ Լ.Գալստյանը: Նրանք անդրադարձան գրողի տարբեր ստեղծագործություններին` ներկայացնելով մեր լինելության ընթացքի և մեր ապագայի գուշակման մաթևոսյանական բանաձևը: