,,ՀԱՅՈՑ ԲԱՆԱԿԸ 19 ՏԱՐԵԿԱՆ Է,,
26.01.2011 թ.
ՀՊՄՀ գիտական գրադարանի ,,Հոբելյանական,, ցուցափեղկում բացվել է ,,Հայոց բանակը 19 տարեկան է,, ցուցահանդեսը: Ցուցադրության են դրվել Հայոց բանակի մասին պատմող չորս տասնյակից ավելի գրքեր, ամսագրեր, լուսանկարներ և մի ձեռագիր: Ցուցադրության հիմքում Հայաստանի Հանրապետության Սահմանադրությունն է: Սահմանադրության համապատասխան հոդվածով է ստեղծվել Հայոց բանակը և դարձել մեր պետականության պաշտպանության կարևորագույն պատվարը: Այստեղ ցուցադրվում են Հայոց բանակի հիմնադիրներ Վազգեն Սարգսյանի ,,Ոգու փորձություն,,, Սամվել Բաբայանի կենսագրական գրքերը, ՀՀ Նախագահ Սերժ Սարգսյանի հանրագիտարանային կենսագրականը, Հայոց բանակի և Արցախի բանակի համար պատրաստված դասագրքեր, ,,Հայոց բանակ,, հանդեսի, Վազգեն Սարգսյանի անվան ռազմական ինստիտուտի ,,Կուրսանտ,, ամսաթերթի առանձին համարներ, ՀՀ ՊՆ տեղեկատվական վարչության պատրաստած ,,Օրացույցը,,: Ցուցադրվում են Հայաստանի պաշտպանության նախարարների մասին հանրագիտարանային նյութեր, ինչպես նաև Տիգրան Հայազնի և Գարեգին Ղազարյանի ,,1000 հայազգի գեներալներ և ծովակալներ,,, Սասուն Գրիգորյանի ,,Հավերժախոս պանթեոն,,, Տիգրան և Հրաչյա Պետրոսյանցների ,,Հայրենիքի համար,, գրքերը, Հայոց բանակին ձոնած երգերի երգարան: Ցուցադրությունում նորություն է Վազգեն Սարգսյանի կողմից 1991 թվականի մայիսի 5-ին Շուռնուխի պատասխանատու Միշային ուղղված գրության բնագիրը: Գրադարանի սրահում բացի այս ցուցահանդեսից Հայոց բանակին և Արցախյան ազատամարտին վերաբերող այլ նյութեր ևս կան:
|