«ՉՈՐԵՔՇԱԲԹԻ» ԳՐԱԿԱՆ ԱԿՈՒՄԲԸ ԱՐՏԱՇԱՎԱՆՈՒՄ

Արագածոտնի մարզի Աշտարակի տարածաշրջանի Արտաշավանի գյուղի Գ.Ասատրյանի անվան միջնակարգ դպրոցի աշակերտների մասնակցությամբ գյուղի մշակույթի տան դահլիճում ապրիլի 13-ին տեղի ունեցավ 2016 թվականի ապրիլյան քառօրյա պատերազմի նվիրյալների հիշատակին նվիրված ցերեկույթ: Այն նվիրված էր նաև գյուղի որդի, հերոս Քյարամ Սլոյանի հիշատակին, որի ծնողները ևս դահլիճում էին:

Բեմադրության հիմքում ընկած էր «Չորեքշաբթի» գրական ակումբի անդամ Սևակ Հովհաննիսյանի «Հենակետ» պատմվածքը /«Չորեքշաբթի Գ», Ե., 2016, էջ 76-85/: Հեղինակը ևս մասնակցում էր միջոցառմանը:

Այլ բանաստեղծությունների թվոիմ հնչեց նաև «Չորեքշաբթի» գրական ակումբի հիմնադիր Տիգրան ՊետրոսՅանցի «Եռաբլուր» բանաստեղծությունը.

...Եվ բանակը այս
Այսօր, վաղը և միշտ
Անզորացիր կամքով՝
Ի սեր Հայաստանի,
Միշտ կլինի շարքում,
Միշտ կլինի զինյալ՝
Արարատի դիմաց՝
Հանուն Ազատության,
Հանուն Անկախության,
Հանուն Հայաստանի...

Միջոցառման ժամանակ հայրենասիրական երգեր կատարեց «Չորեքշաբթի» գրական ակումբի անդամ Արմենուհի Թամոյանը:

Ցերեկույթն իր աշակերտների միջոցով պատրաստել էր դպրոցի հայոց լեզվի և գրականության ուսուցիչ, Մանկավարժական համալսարանի շրջանավարտ, բանաստեղծ, «Չորեքշաբթի» գրական ակումբի անդամ Անահիտ Պապոյանը:

Սյուզաննա Առաքելյան