ՄՇԱԿՈՒԹԱՅԻՆ ՇԱԲԱԹ-ԿԻՐԱԿԻ
Հուլիսի 4-ի շաբաթ և 5-ի կիրակի օրերը խիստ մշակութային ստացվեցին:
Շ ա բ ա թ
Իմ լավ բարեկամ Հովհաննես Պապիկյանի հրավերով «Մոսկվա» կինոթատրոնի կարմիր դահլիճում ակընդիր եղա նրա և Շուշանիկ Սահակյանի նկարած «Էն ուրիշ Ֆրունզիկը» վավերագրական ֆիլմին: Մեկ բառով ամբողջացնեմ խոսքս՝ ՀՐԱՇԱԼԻ էր: Անկախ երևանյան ահավոր շոգին, անկախ առկախված փողոցները, դահլիճում էր հայոց մտավորականության ծաղիկը: Ֆիլմն ընդունվեց հոտընկայս ու երկարատև ծափահարություններով, բազմաթիվ բարեմաղթանքներով:
Կ ի ր ա կ ի
Մտավորականների մի խմբի հետ, որ հավաքագրել է ճարտարագիտական համալսարանի դասախոս, արժանավոր մտավորական Ռոմիկ Հովնանյանը, մեկօրյա արշավ իրականացրեցինք Հառիճ-Մարալիկ քաղաքներ:
Ճանապարհին, ըստ նախնական պայմանավորվածության, Արթիկ քաղաքում մինչև Հառիճ մեկնելը և Հառիճից վերադարձին հյուրընկալվեցինք Խաչատուր Աբովյանի անվան հայկական պետական մանկավարժական համալսարանի աշխարհագրության ամբիոնի վարիչ Աշոտ Աջամօղլյանի հյուրընկալ հարկի տակ: Այստեղ նրա ամբողջ ընտանիքը մայրիկի գլխավորությամբ, հարևանները, Արթիկ քաղաքի քաղաքապետը հոյակապ ընդունելություն կազմակերպեցին: Ճանաչողական բավականին հաջող ներկայացում կատարվեց Հառիճի պատմամշակութային համալիրում, որ նաև գործող եկեղեցի և ուսումնական կենտրոն է:
Մարալիկ քաղաքի կենտրոնական հրապարակում խումբը այցելեց և հիշատակի գլուխխոնարհում կատարեց Հայոց վրիժառության ռահվիրա Սողոմոն Թեհլիրյանի նորաբաց արձանին:
Խմբի կազմում էր նաև երգչուհի-երգահան Լիլիթ Համբարձումյանը, որ սիրով կատարեց մեր համատեղ «Զորավար», «Ձեզնով սկսվեց» երգերը: |
