137-ՐԴ ՀԱՆԴԻՊՈՒՄԸ
2015 թ-ի դեկտեմբերի 12-ին, շաբաթ օրը, Խաչատուր Աբովյանի անվան հայկական պետական մանկավարժական համալսարանի գիտական գրադարանի հումանիտար գրականության ընթերցասրահի փոքր դահլիճում տեղի ունեցավ «Չորեքշաբթի» գրական ակումբի հերթական 137-րդ հանդիպումը:
Հերթական հանդիպմանը հյուրաբար մասնակցեցին ակումբի անդամներ Աննա Թադևոսյանի մայրը՝ Մելսիդա Հակունցը, Սևակ Հովհաննիսյանի հայրը, Մանկավարժական համալսարանի 1967 թ-ի շրջանավարտ Բաղդասար Հովհաննիսյանը, Լուսինե Հակոբյանի հայրը:
Մելսիդա Հակունցը «Չորեքշաբթի» գրական ակումբին նվիրեց ժամեր առաջ տպարանից վերցրած բանաստեղծությունների իր առաջին՝ «Անթեղված երազներ» գիրքը: Բաղդասար Հովհաննիսյանը նվիրեց հայրենի գյուղի մասին հրատարակած իր «Վաղաշեն» գիրքը:
Տիգրան ՊետրոսՅանցը շնորհակալություն հայտնեց նվեր ստացած գրքերի համար և հեղինակներին մաղթեց քաջառողջություն ու ստեղծագործական նոր հաջողություններ:
Հանդիպման «Ստեղծագործական ժամացույց» բաժնում իրենց նոր ստեղծագործությունները ներկայացրեցին Մադոննա Մնացականյանը /«Մտքեր»/, Մարգարիտ Հովսեփյանը /«Ջորջիկը», «Մենություն»/, Վարդան Գրիգորյանը /«Նոր տարի»/, Իշխան Բադալյանը /քառյակներ/, Մելսիդա Հակունցը /«Ֆրունզը»/, Լուսինե Հակոբյանը /«Գիրք, տուն, մեքենա»/, Անուշիկ Թովմասյանը /«Մտքի, սրտի զրույցը»/, Ռուզաննա Սարգսյանը /«Տիկին Մարիամ»/: Բոլոր ստեղծագործությունների շուրջ ծավալվեց օգտակար քննարկում:
Հանդիպման «Մշակութայի լուսանցք» բաժնում Լուսինեն, Ռուզաննան, Սևակը և Վահագն Մովսիսյանը կատարեցին մեկ տասնյակ հայրենասիրական և լիրիկական երգեր: Մելսիդա Հակունցը կարդաց իր «Խոսեք հայերեն», Սևակ Հովհաննիսյանը՝ Կարեն Թավրիզյանի «Տխրություն» բանաստեղծությունները, Աիդա Ադամյանը՝ Վահագն Դավթյանի ստեղծագործություններից մեկը:
Ջերմ ու ուսանելի խոսք ասաց Բաղդասար Հովհաննիսյանը՝ գնահատեց
«Չորեքշաբթի» գրական ակումբում ներկայացված ստեղծագործությունները: Առանձնակի ներկայացրեց իր տպավորությունները Տիգրան ՊետրոսՅանցի «1000 հայազգի գեներալներ, ծովակալներ» կենսագրական հանրագիտարանի մասին: Նա մասնավորապես առաջարկեց գիրքը 1. ներկայացնել ՀՀ Նաագահի մրցանակի, 2. Երևանում անվանակոչել գեներալների փողոց, 3. գիրքը ներառել ուսուցման գործընթացում որպես դասագիրք, 4. գիրքը թարգմանել և հրատարակել ռուսերեն, անգլերեն, ֆրանսերեն, իսպաներեն:
Հանդիպումն ամփոփեց Տիգրան ՊետրոսՅանցը:
|