Հոգեվարքի տենդը բոցկլտում է շուրջս
Եսիցս քարշ տալիս մի մոլորված կես,
Զառանցանքում զոհաբերված անուրջս
Ձգտում է դեպի հավերժությանն անտես:

Վաղանցիկ կյանքում մի ճամփորդ եմ ես,
Որ հույսերիդ ծիածանին հավատ ընծայեց
Եվ օվկիանի փխրուն փրփուրների պես
Քեզ սիրառատ ալիքներում հեզ փայփայեց:

Գորշ ճամպրուկս լցված հույզերովս թանկ,
Թողնում եմ ճնապարհների խաչմերուկում,
Քեզ հետ ունեցած անջնջելի մի խենթ կյանք
Ավա~ղ ամփոփվեց իմ խղճուկ ճամպրուկում:
 
  -----------

Կաթկթում է լույսը,
ես քո զարթուցիչն էի,
շուրթերդ սեղմվում են համբերության բաժակի մեջ,
բարձի փետուրները թռչում են ,
վեր, վեր,
ուր երբեք մենք չեղանք
աչքերիդ սևությունից հոսում են բառեր,
որ երբեք չթարգմանվեցին,
բացվում է երկինքը
հայացքների համար,
որ ճանաչում էին իրար,
բայց խոստացել են անծանոթ լինել,
եվ կրկնվում է այն պահը,
որ պահվելու է մինչև հավիտենություն
փոքրիկս, երանի մարեիր արևը,
որ ես չտեսնեի ինձ քո թաց ժպիտում
սահում է առավոտը
հրաժեշտի տոմսերը սպառվել են
իսկ աշխարհը ուրիշ է,
ուրիշ է արդեն փոքրիկս.....

Վարդագույն են ամպերը
փշրված հեռադիտակից.
տանիքից վեր ես մենակ չեմ,
մի կում լույս
ըմպում եմ երկնքից,
որ կարողանամ մարել այն մոնմերը,
որ դու երբեք չվառեցիր տարեդարձիդ...
ես քո քույրն եմ,
առանց քեզ՝ քո մեծ քույրը.

խոնավ են աչքերը լուսաբացի.
մայթերին լճակներ են,
ես կոտրվում եմ էլի,
բայց փշրված հեռադիտակից դու մոտ ես եղբա՜յրս...

Ճամփաբաժանին ես մենակ եմ,
պահարանից աղավնիներ թռան,
հայելիները գոլորշիացան հայացքների հետ,
քամու ճաքած շուրթերը
կապույտ պղպջակներ փչեցին,
ու մի աղջնակ, որ ես էի,
պղպջակների մեջ իր դեղին երկինքն էր գծում...
ես կանգնած եմ,
իսկ փողոցները քայլում են տխուր
սոված քաղաքի պաստառների տակ,
և աչքերս, որ փոխվել չեն կարող՝
թարթում են գարուն...
«երբեք չլքես քո քաղաքը,
կապույտ պղպջակներ չկան,
և անշունչ են աղավնիները
ճամփաբաժնից հետո»........

Հույսի միջանցքում ես լաց կլինեմ
և ոչ ոք չի իմանա ինձ,
ոչինչ չի լինի իմը,
բռունցքիս մեջ արևը կդողա ,
սիրտս կկծկվի պատի տակ,
եվ ամպերի փոշին
կսառի թարթիչներիս,
ես կլինեմ օտար,ես կլինեմ ուրիշ
այս աշխարհի վրա,
այս աշխարը ուրիշ,այս աշխարհը օտար
շնչիս հետ կհևա,
կբուրի տխուր հետոն
կլինեմ քեզ մտերիմ,կլինեմ միշտ քեզ ընկեր,
որ հույսի միջանցքում
դու երբեք լաց չլինես.....