ՆՈՐ ՑՈՒՑԱԴՐՈՒԹՅՈՒՆ
Խաչատուր Աբովյանի անվան ՀՊՄՀ գիտական գրադարանի հումանիտար գրականության ընթերցասրահում բացվել է ՀՊՄՀ քիմիայի և նրա դասավանդման մեթոդիկայի ամբիոնի վարիչ, քիմիական գիտությունների թեկնածու, դոցենտ Աշոտ Բաբախանյանի ՛՛ՀԻՆ-ՆՈՐ ԵՐԵՎԱՆ՛՛ ծրարների ցուցահանդեսը: Հեղինակի հավաքածուն հարուստ է ու ներկա ցուցադրությունը դրա ընդամենը մի փոքրիկ մասն է և ներկայացնում է խորհրդային տարիներին ՛՛ԽՍՀՄ փոստ՛՛ գործակալության կողմից պատրաստված ծրարներ, որոնց վրա կան Երևան մայրաքաղաքի տարբեր կառույցներ ներկայացնող պատկերներ:
Ծրարների առաջին շարքում պատկերված են Երևանի հպարտությունը հանդիսացող շինությունները: Այստեղ պատկերված են ՀԽՍՀ կառավարության շենքը, ՀԿԿ կենտկոմի շենքը /ներկայում՝ ՀՀ Ազգային ժողովի շենքը/, Գիտությունների ակադեմիայի շենքը, ՛՛Զվարթնոց՛՛ օդանավակայանը, Մատենադարանի շենքը, Թումանյան փողոցը, ՛՛Մոսկվա՛՛ կինոթատրոնի շենքը, Արտասահմանյան երկրների հետ բարեկամության և կուլտուրական կապերի հայկական ընկերության շենքը, ՛՛Արմենիա՛՛, ՛՛Դվին՛՛, ՛՛Հրազդան՛՛, ՛՛Սևան՛՛ հյուրանոցների շենքերը, Հրազդանի կամուրջը, Ալեքսանդր Սպենդիարյանի անվան օպերայի և բալետի պետական ակադեմիական թատրոնի շենքը, Գաբրիել Սունդուկյանի անվան պետական ակադեմիական դրամատիկական թատրոնի շենքը, Երևանի շախմատի կենտրոնական տան շենքը, ՛՛Էրեբունի՛՛ թանգարանի շենքը, Մարտիրոս Սարյանի տուն-թանգարանը, Շահումյան հրապարակը: Ծրարների երկրորդ շարքում պատկերված են Երևանի հուշարձանները: Ներկայացված են ՛՛Սասունցի Դավթի՛՛, ՛՛Մայր Հայաստանի՛՛, ՛՛Սայաթ-Նովայի՛՛, ՛՛Կոմիտասի՛՛ արձանների լուսանկարները:
Ցուցահանդեսը թույլ է տալիս պատկերացում կազմելու խորհրդային նամականիշային մոտեցումների մասին:
Աննա ՄԱՐՏԻՐՈՍՅԱՆ
ՀՊՄՀ գիտական գրադարանի ավագ գրադարանավար
|
