Վարպետաց դաս
ԱՐԹՈՒՐ ՕՇԱԿԱՆՑՈՒ ՆԿԱՐՆԵՐԸ ԾՆՎԵՑԻՆ
ՈՒՍԱՆՈՂՆԵՐԻ ՆԵՐԿԱՅՈՒԹՅԱՄԲ
Խաչատուր Աբովյանի անվան Մանկավարժական համալսարանի գիտական գրադարանի տնօրեն Տիգրան ՊետրոսՅանցի և Համալսարանի գեղարվեստական կրթության ֆակուլտետի դեկան, արվեստագիտության դոկտոր Արա Հակոբյանի նախաձեռնությամբ ֆակուլտետում հյուրընկալվեց նույն ֆակուլտետի նկարչական բաժնի 1976 թ-ի շրջանավարտ, լոնդոնաբնակ հայտնի նկարիչ Արթուր Օշականցին:
Գեղարվեստական կրթության ֆակուլտետի մեծ սրահում կազմակերպվեց հանդիպում-վարպետաց դաս նկարչական բաժնի բակալավրիատի և մագիստրատուրայի ուսանողների համար:
Հարյուրից ավելի ուսանողներին և հյուրերին ողջունեց ֆակուլտետի դեկան Արա Հակոբյանը:
Արթուր Օշականցի մարդուն-ստեղծագործողին ներկայացրեց Տիգրան ՊետրոսՅանցը:
Իր, իր ստեղծագործական ճանապարհի, ստեղծագործական փուլերի, ստեղծագործելու տեխնիկայի մասին համառոտ խոսեց Արթուր Օշականցին:
Այնուհետև ներկաների համար գործնական տեսանելիության պայմաններում նա սկսեց միաժամանակ ստեղծագործել երեք կտավների վրա: Այն ինչ կատարվում էր այդ պահին սրահում, ոչ միայն ստեղծագործական երկունք էր, այլ նաև գույների հետ իրական կախարդի խաղ: Ստեղծագործության ամբողջ ընթացքում նա նաև բացատրում էր իր գործողությունները և երևակայությունում ստեղծվող պատկերները, որ իրականացնում էր կտավի վրա: Նկարիչը տարերքի մեջ էր և ընդամենը մեկ ժամում ստեղծեց երեք նկարահենք /իր խոսքով դրանք դեռ ավարտուն չէին/:
Աշխատանքի ավարտից հետո Արթուր Օշականցին պատասխանեց ուսանողների և դասախոսների բազմաթիվ հարցերի:
Սյուզաննա ԱռաքելՅան
Լուսանկարները՝ հեղինակի
Նկարները տես՝ https://www.facebook.com/photo.php?fbid=1452661661507523&set=pcb.1452667724840250&type=3&theater |