Խ. Աբովյանի անվան մանկավարժական համալսարանի առաջին կուրսեցիները երդում են տվել
05.10.2010 15:16
Լիանա Եղիազարյան
«,Ռադիոլուր,,
Խաչատուր Աբովյանի տուն-թանգարանում այսօր տեղի է ունեցել Երեւանի` Խ.
Աբովյանի անվան մանկավարժական համալսարանի շուրջ 1440 առաջին կուրսեցիների
երդման արարողությունը: Սա արդեն ավանդույթ դարձած մի միջոցառում է, որն
ամեն տարի կազմակերպում է հանրապետությունում իր մեծությամբ երկրորդ բուհը,
որտեղ այսօր սովորում է շուրջ 15 հազար ուսանող: Երդման արարողությանը
ներկա են եղել բուհի նորանշանակ ռեկտոր Ռուբեն Միրզախանյանը, բուհի նախկին
սան, ներկայիս ԱԺ պատգամավոր Էդուարդ Շարմազանովը: Ուսանողներին, սակայն,
հատկապես ոգեւորել է աշխարհահռչակ դուդուկահար Ջիվան Գասպարյանի
ներկայությունը եւ նրա կողմից իրենց նվիրված կատարումը:
«Այս հանդիսավոր ու նվիրական պահին երդվում եմ` հավատարիմ մնալ այն կոչմանը, որին հավատարմագրվել եմ կամովին»:
Մեր ապագա մանկավարժներն են: Արդեն տասնամյակներ ի վեր Երեւանի` Խ.
Աբովյանի անվան մանկավարժական համալսարանում ավանդույթ է` առաջին
կուրսեցիները Խաչատուր Աբովյանի տուն-թանգարանում երդվում են սերունդների
առջեւ իրենց պարտքն ու իրենց աշխատանքը կատարել բարեխղճորեն: 2012-ին
մանկավարժական համալսարանը կնշի իր գոյության 90 ամյակը:
«Մեր համատեղ աշխատանքի հաջողությամբ է պայմանավորված վաղվա ազգային դպրոցի
հաջողությունը»,- բուհի նորանշանակ ռեկտոր Ռուբեն Միրզախանյանն իր խոսքն
ուղղեց առաջին կուրսեցիներին:
Մանկավարժականում անցկացրած իր համալսարանական տարիներն այսօր հիշեց նաեւ
ազգային ժողովի ներկայիս պատգամավոր Էդուարդ Շարմազանովը: Հիշեց, որ մեր
պատմության ամենադժվար ժամանակներում էլ չեն դադարել գործել հայկական
դպրոցները:
«Դպրոցն անկախ Հայաստանում պետք է դառնա հայրենասիրության տաճար, եւ դուք
պետք է լինեք այն սերունդը, որը պետք է զարգացնի հայագիտությունը»,- ասաց
պատգամավորը:
Մանկավարժական համալսարանականների երդումը զուգակցվեց նաեւ եկեղեցական
օրհնանքով ու ավանդական հայկական դուդուկով: Պապ ու թոռ Ջիվան
Գասպարյաններն էլ այսօր կրկին հնչեցրին հայտնի Դլե-յամանը, սակայն այս
անգամ` որպես անկեղծ կոչ` գիտությանն ու կրթությանն ավելի մեծ տեղ
հատկացնել:
«Մեր ժողովուրդը փոքր է, ու գիտությանը պետք է ավելի մեծ տեղ հատկացնել, որ կարողանա իրեն պաշտպանել: Միայն բիզնեսով չէ»:
Մնում է հուսալ, որ օրերից մի օր հետեւում կմնա անգրագետ կամ շահամոլ
մանկավարժների մասին ներկայիս իրականությունը, ինչի մասին բազմիցս է
ահազանգվում, իսկ մինչ այդ նաեւ տեղեկացնենք` Խաչատուր Աբովյանի
տուն-թանգարանում նոր ցուցասրահ է բացվել, եւ այսօր տուն-թանգարան մուտքն
ազատ է:
|