Հանդիպում Տիգրան Մանսուրյանի հետ Հանրապետության
ժողովրդական արտիստ, կոմպոզիտոր Տիգրան Մանսուրյանի հետ հանդիպմանը
Խաչատուր Աբովյանի անվան հայկական պետական մանկավարժական համալսարանի
կուլտուրայի ֆակուլտետի դահլիճում ներկա էին դասախոսներ եւ ուսանողներ, նրա
արվեստի երկրպագուներ։ Արվեստագետին ներկայացրեց համալսարանի մշակույթի կենտրոնի տնօրեն Արկադի Շեկունցը։ Երաժշտությունը
նրա համար սոսկ երաժշտություն չէ. նրանում ամփոփված է իր մեծ սերը հայոց
լեզվի ու գրականության հանդեպ։ Պատահական չէր 1967—ին Քուչակի հայրեններին
անդրադառնալու նրա մոտեցումը. գույների հյուսվածք ու անսովոր
կենսասիրություն, որ կոմպոզիտորի մատների ներքո վերածվեցին մեղեդու։ «Ես
սփյուռքի ծնունդ եմ, եւ իմ ականջը մշտապես շոյել է եկեղեցում թեւածող
հոգեւոր երաժշտությունը, իմ մտապատկերում Հառիճի վանքն է, ուր հաճախ էի
լինում, ու Շիրակի դաշտը...»։ Երջանկություն է Ղազարոս Սարյանի նման
ուսուցիչ ունենալ, իսկ Իսահակյանին նա համարում է իր հոգեւոր հայրը։ Խորհրդային
տարիներին երգիչներին որոշակի սկզբունքներ ու չափանիշներ էին
ներկայացնում, իսկ այսօր շատերն են երգում, ով ունի երգելու ցանկություն...
Մեր օրերի խայտաբղետ երաժշտական դրսեւորումների մասին մեղմ ու հանգիստ է
արտահայտվում՝ նկատելով, որ, այնուամենայնիվ, ինքնամաքրման առաջ տեղի կտան
բոլոր մակերեսային երեւույթները... Տարիներ առաջ կուլտուրայի ֆակուլտետի
դեկան Կառլեն Միրզախանյանի հրավերով եկավ դասավանդելու մանկավարժականում,
ունեցավ լավ ուսանողներ, այդ թվում՝ Մովսես Գորգիսյան եւ հրաշալի
գործընկերներ։ «Այդ տարիներն առ այսօր իմ հպարտությունն են»,— ասում է մեծ
երգահանը։ Համալսարանի գիտխորհրդի որոշմամբ՝ ռեկտորի պաշտոնակատար Ռուբեն
Միրզախանյանը երգահանին պարգեւատրեց համալսարանի բարձրագույն պարգեւով՝
Խաչատուր Աբովյանի մեդալով, եւ հրավիրեր մանկավարժական՝ դասավանդելու,
վարպետության դասեր տալու ապագա մանկավարժներին։ Համալսարանի նորաստեղծ
երգչախումբը, երիտասարդ խմբավար Իրինա Հովսեփյանի գլխավորությամբ
ներկայացրեց Մանսուրյանի ստեղծագործություններից։ «Կարեւորն այն է, որ
երգը մարդու սրտից ու հոգուց բխի»,— ասում է Տիգրան Մանսուրյանն ու
մոտենում դաշնամուրին՝ մեզ՝ ներկաներիս, որերորդ անգամ տանելով իր
զարմանահրաշ մեղեդիների աշխարհը՝ իր անսահման բարության ու անսպառ հմայքի
միջով։
Սիլվա ԱՍՐՅԱՆ |