Շնորհավոր Մարտի 8

ԵՐԿՈՒ ՆՈՐ ՑՈՒՑԱԴՐՈՒԹՅՈՒՆ

Խաչատուր Աբովյանի անվան Մանկավարժական համալսարանի գիտական գրադարանի հումանիտար գրականության ընթերցասրահում կանանց միջազգային օրվա՝ մարտի 8-ի առթիվ բացվել է երկու նոր ցուցադրություն:

1

ՀԱՄԱԼՍԱՐԱՆԻ ԿԻՆ ԴԱՍԱԽՈՍՆԵՐԻ ԳՐՔԵԸ

Ցուցադրությունում ներկայացված են գիտության դոկտորներ Աելիտա Դոլուխանյանի, Մելանյա Աստվածատրյանի, Աիդա Թոփուզյանի, Սրբուհի Գևորգյանի, Շողիկ Ոսկանյանի, Լաուրա Ասատրյանի, Ջուլիետա Գյուլամիրյանի, Հասմիկ Հովհաննիսյանի, Ռուզան Թադևոսյանի, Կարինե Դանիելյանի և 70-ից ավելի գիտության թեկնածուների հրատարակած մոտ 180 գիրք: 
Ցուցադրության առթիվ գրադարանի տնօրեն Տիգրան ՊետրոսՅանցը նշեց, որ գրադարանն էլ տոնի առթիվ իր պարտքն է համարում ներկայացնել բուհի կին դասախոսների հրատարակած դասագրքերը, ուսումնաօժանդակ ձեռնարկները, մենագրությունները: «Այս ձեռնարկը կարևոր է նաև նրանով, որ ուսանողները, հատկապես առաջին կուրսեցիները, անմիջապես տեսնում են իրենց դասախոսների գրքերը և առաջիկայում կօգտվեն դրանցից».- նշեց տնօրենը: Ցուցադրությունը կգործի մինչև ապրիլի 7-ը:

2

ՆԱԵՎ ՆԱՄԱԿԱՆԻՇԵՐՈՎ

Երկար տարիների ընթացքում Մանկավարժական համալսարանի դասախոս, կենսաբան Աշոտ Բաբախանյանը հավաքել է հայկական, խորհրդային, աշխարհի այլ պետություններում տպագրված ու շրջանառության մեջ դրված նամականիշեր ու ծրարներ:
Կանանց միջազգային օրվա առթիվ նա 11 տախտակների վրա հավաքել է այդ և այլ առիթներով Հայաստանի Հանրապետության, Խորհրդային Միության և Դեմոկրատական Ռուսաստանի փոստային շրջանառության մեջ դրված ծաղկանկար ծրարներ և նամականիշներ:

Աշոտ Բաբախանյանը և Տիգրան ՊետրոսՅանցը կենտրոնական տախտակի վրա գրել են.

«ՊԱՇՏԵԼԻ ՀԱՅՈՒՀԻՆԵՐ: Գարնան ծաղկաբույր ներկայությունը հազարավոր գույներով լցրել է մեր իրականությունը և կյանքին տվել է կանացի գեղահրաշ կերպար:
Մենք սիրում ենք քնքուշ ու նրբիկ, հմայիչ ու գեղուհի, կամային ու հզոր, առյուծասիրտ ու հայրենապաշտ հայ կնոջը, որ տատ է, մայր, կին, դուստր, հարս, թոռնուհի:
Սիրով ու ծաղիկներով շնորհավորում ենք Ձեր միամսյակը, սիրելի կանայք»:

Աննա ՄԱՐՏԻՐՈՍՅԱՆ
գրադարանի բաժնի վարիչ