«ԱԶԳ» ՕՐԱԹԵՐԹ #159, 09-09-2011 «ՏԵՐ ԿԱՆԳՆԵՔ ՍՓՅՈՒՌՔԱՀԱՅ ԳՐԱԿԱՆՈՒԹՅԱՆԸ» Սեպտեմբերի 8-ին Խաչատուր Աբովյանի անվան հայկական
պետական մանկավարժական համալսարանի բանասիրական ֆակուլտետի ուսանողների
համար «Ակնարկներ սփյուռքահայ գրականության» թեմայով դասախոսությամբ հանդես
եկավ սփյուռքահայ գրական, հասարակական, քաղաքական գործիչ Երվանդ Ազատյանը : Բանախոսը
ներկայացրեց սփյուռքահայ տարբեր գաղութներում գրական հոսանքների
ձեւավորման ու զարգացման ընթացքը` ի դեմս այն մտավորականների, որոնք
ստեղծեցին իրենց դպրոցը` հենվելով արեւմտահայ գրական ավանդների վրա, ինչպես
նաեւ ինտեգրելով եվրոպական տարրեր: Թեեւ ինչպես 50
տարի առաջ, այնպես էլ այսօր կա այն մտահոգությունը, թե սփյուռքահայ
գրականությունը կմահանա, սակայն սփյուռքը շարունակում է նոր գրականություն
ստեղծել եւ զարգացնել: Երվանդ Ազատյանը խոսեց Եվրոպա
եւ Ամերիկա գաղթած մտավորականության մասին, ովքեր հիմնեցին գրական տարբեր
հանդեսներ` դրանց շուրջ համախմբելով սփյուռքահայ գրական միտքը: «Այսօր
Հայաստանում շատ քիչ մարդիկ կան, ովքեր անդրադառնում են սփյուռքահայ
գրականությանը, մինչդեռ անհրաժեշտ է կամրջել Հայաստանի եւ սփյուռքի
գրականությունն ու լեզուն, քանզի սփյուռքահայ գրականության ճակատագիրը
վտանգված է,-հայտարարեց Ազատյանն ու կոչ արեց ուսանողներին,- պետք է տեր
կանգնել սփյուռքահայ գրականությանը, որպես ապագա բանասերներ` հայ
գրականությունը ճանաչեք իր ամբողջության մեջ, այսօր ազատ ու անկախ
Հայաստանն այդ հնարավորությունն ընձեռում է»: Սեպտեմբերի 15-ին ուսանողները եւս մեկ հնարավորություն կունենան լսելու
Երվանդ Ազատյանին` այս անգամ Զարեհ Մելքոնյանին նվիրված դասախոսությամբ:
| 
