ՀՊՄՀ գիտական խորհրդի նոյեմբերի 19-ի որոշմամբ պատվո պրոֆեսորի կոչումներ շնորհվեցին ՀՊՄՀ նախկին ռեկտորներ, ՀՀ Գիտությունների ակադեմիայի ակադեմիկոսներ Էդվարդ Ղազարյանին, Գևորգ Բաղդասարյանին, Միսակ Դավթյանին, պատվո դոկտորի կոչում` ամերիկահայ փաստաբան  դոկտոր Արսեն Դանիելյանին:
     Նոյեմբերի 23-ին ՀՊՄՀ գիտխորհրդի դահլիճում տեղի ունեցավ պատվո դիպլոմների հանձնման արարողություն:
     Կենսաբանության, քիմիայի և աշխարհագրության ֆակուլտետի դեկան Սվետլաննա Հովակիմյանը ներկայացրեց ակադեմիկոս Միսակ Դավթյանի, ֆիզիկատեխնոլոգիական ֆակուլտետի դեկան Գարիկ Եղիազարյանը` ակադեմիկոս Էդվարդ Ղազարյանի, մաթեմատիկայի և ինֆորմատիկայի ֆակուլտետի դեկան Լևոն Արաբաջյանը` ակադեմիկոս Գևորգ Բաղդասարյանի, պատմության և իրավագիտության ֆակուլտետի դեկան Էդիկ Գևորգյանը` դոկտոր Արսեն Դանիելյանի հակիրճ կենսագրությունն ու գիտական գործունեությունը:
     ՀՊՄՀ ռեկտորի պաշտոնակատար Ռուբեն Միրզախանյանը շնորհավորեց յուրաքանչյուրին և հանձնեց պատվո դիպլոմը:
     Ակադեմիկոսներ Էդվարդ Ղազարյանը, Գևորգ Բաղդասարյանը, Միսակ Դավթյանը հանդես եկան շնորհակալական խոսքով: Հուզիչ էր դոկտոր Արսեն Դանիելյանի շնորհակալական խոսքը: Նա կարևորեց իրեն տրված պատվո դոկտորի կոչումը և պարտավորվեց տարին մեկ անգամ այցելել ՀՊՄՀ և իրավաբանական ֆակուլտետի ուսանողների համար կարդալ դասախոսություն ու ամերիկյան օրենսդրության մասին վարպետության դաս անցկացնել: