«ՉՈՐԵՔՇԱԲԹԻ» ԳՐԱԿԱՆ ԱԿՈՒՄԲԻ
ԱՆԴԱՄՆԵՐԻ ԱՅՑԸ ԱԲՈՎՅԱՆ ՔԱՂԱՔ
Մայիսի 4-ին Խաչատուր Աբովյանի անվան Մանկավարժական համալսարանի գիտական գրադարանի «Չորեքշաբթի» գրական ակումբի անդամներն այցելեցին Աբովյան քաղաք:
Այցի առաջին մասում Մանկավարժականի ուսանողներ Արմենուհի Սումբուլյանը, Էվելինա Միրզոյանը, Գոռ Բակումյանը, Արև Ամիրշադյանը, Միշա Թադևոսյանը, Հայ-ռուսական /Սլավոնական/ համալսարանի ուսանող Սոֆի Գրիգորյանը, ՀՀ Ոստիկանության կրթահամալիրի կուրսանտ Նաիրա Շահինյանը, «Չորեքշաբթի» գրական ակումբի անդամ Հրաչյան /Ժորա Հակոբյան/, Իշխան Բադալյանը, ՀՊՄՀ գիտական գրադարանի տնօրեն, «Չորեքշաբթի» գրական ակումբի հիմնադիր Տիգրան ՊետրոսՅանցը պտույտներ կատարեցին Աբովյան քաղաքի հրապարակում և հանգստի գոտում, այցելեցին նորակառույց Սուրբ Հովհաննես եկեղեցի:
Այցի հիմնական նպատակի շրջանակներում «Չորեքշաբթեցիները» մասնակցեցին Աբովյանի էստրադային և ջազային արվեստի ստուդիայի «Աշխարըս մե փանջարա է» խորագրով գրական-գեղարվեստական երեկոյին, որը նվիրված էր հայ մեծանուն աշուղ Սայաթ-Նովայի 300-ամյակին:
Տիգրան ՊետրոսՅանցը Աբովյան քաղաքի հեռուստաընկերությանը տված հարցազրույցում նշեց որ «Խիստ կարևոր են նմանօրինակ միջոցառումները, քանի որ դրանք կրկնակի խնդիր են լուծում: Առաջինը, որ դաստիարակչական արժեք ունեն և այսօր ապրողներին ու հատկապես երիտասարդությանը ծանոթացնում են մեծ հայի՝ Սայաթ Նովայի կյանքին և ստեղծագործությանը, երկրորդ, որ մշակութային կյանքը չեն պայմանավորում միայն մայրաքաղաքով: Այս առումով գնահատելի է Աբովյանի էստրադային և ջազային արվեստի ստուդիայի ղեկավար, կոմպոզիտոր, երգիչ Մամիկոն Բադալյանի աշխատանքն ու նվիրումը»:
|
