ՀՅՈՒՐ ԷԻՆ «ՀԵՐԱՑԻ» ԱՎԱԳ ԴՊՐՈՑԻ ԱՇԱԿԵՐՏՆԵՐԸ
20.05.2016
Խաչատուր Աբովյանի անվան Մանկավարժական համալսարանի գիտական գրադարանը ամենօրյա /տարվա 362 օրը/ աշխատանք է տանում գրքի պրոպագանդման, գիրքը ընթերցողին հասցնելու ուղղությամբ: Այդ աշխատանքին զուգահեռ նաև ներհայաստանյան շրջանակներում ապահովում է թե համալսարանի, թե գրադարանի հանրայնացումը:
Գրադարանում է ծավալվում «Չորեքշաբթի» գրական ակումբի ամենշաբաթյա հանդիպումները: Արդեն կայացել է 161 հանդիպում, որին մասնակցում են նաև 10 այլ բուհերի ուսանողներ և բազում ընթերցողներ Հայաստանից և արտերկրից: Այս ակումբով անցած շատ ընթերցողներ երեք տարվա ընթացքում դարձել են Մանկավարժականի բակալավրիատի ուսանողներ կամ մագիստրանտներ:
Գրադարանը վեց տարի կազմակերպում է «Լավագույն ընթերցող» ներբուհական մրցույթ, որի ընթացքում լավագույններին պարգևատրում են նրանց ծնողները, նրանց դպրոցների դասղեկներն ու տնօրենները: Սա լավագույն հետադարձ պրոպագանդա է և դարձյալ համալսարան է բերում նոր ուսանողների:
Գրադարանի դռները բաց են ոչ մանկավարժականցի բոլոր ընթերցողների համար, ինչի արդյունքում գրադարանն ունի հանրապետությունում ամենաշատ՝ 21.000 ընթերցող:
Գրադարանում մշտապես կազմակերպվում են գրքի թեմատիկ ցուցադրություններ, գրքերի շնորհանդեսներ, գրողների հետ հանդիպումներ, նկարչական ցուցահանդեսներ, որոնք ևս նպաստում են համալսարանի հանրայնացմանը:
Գործունեության վերջին տարիների կարևոր աշխատանքներից մեկն էլ հանրակրթական դպրոցների աշակերտների այցերի կազմակերպումն է գրադարան:
Այդպիսի ձեռնարկ էր Մխիթար Հերացու անվան բժշկական համալսարանի «Հերացի» ավագ դպրոցի հասարակագիտական հոսքի 11-րդ դասարանի աշակերտների այցելությունը Մանկավարժականի գրադարան: Այցը նախապատրաստել էր «Հերացի» ավագ դպրոցի գրադարանավար, Մանկավարժական համալսարանի շրջանավարտ, «Չորեքշաբթի» գրական ակումբի անդամ Հասմիկ Բաբաջանյանը: Աշակերտներին ուղեկցում էր դասղեկ, Մանկավարժական համալսարանի շրջանավարտ Մարինե Կիրակոսյանը:
Հասարակագիտական հոսքում սովորող աշակերտներին հետաքրքրում էր Մանկավարժականի գրադարանում բացված «Մայիսյան հերոսամարտեր» ցուցադրությունը:
Մանկավարժական համալսարանի գրադարանի տնօրեն Տիգրան ՊետրոսՅանցը աշակերտներին հանգամանորեն ներկայացրեց ցուցահանդես կազմակերպելու սկզբունքներին և մասնավորապես խոսեց տվյալ ցուցադրության մասին:
Ցուցադրությանը ծանոթանալուց հետո հյուրերը հրավիրվեցին գրադարանի փոքր սրահ և Տիգրան ՊետրոսՅանցը աշակերտների հետ մի յուրօրինակ խոսակցության ծավալեց մասնագիտական կողմնորոշման մասին, հնարավորություն տվեց տասնմեկերորդ դասարանցիներին իրենց կարծիքները հայտնելու իրենց կողմնորոշման, արդեն կատարած ընտրության լավ և ավելի լավ տարբերակների շուրջ, կոչ արեց նրանց մեկ տարի հետո, երբ ավարտեն 12-րդ դասարանը՝ ուղիղ գան Մանկավարժական համալսարան, որտեղ կարող են իրացնել իրենց կարողությունները և ստանալ բարձրորակ մասնագիտական կրթություն:
Վերջում, ի հիշատակ օրվա, աշակերտներից յուրաքանչյուրին նվիրվեց Սումգայիթի եղերնագործության մասին պատմող գիրք, իսկ դպրոցի գրադարանին՝ հասարակագիտական գրքեր: |
