Արթուր Կարապետյան
Արարատը բարձրանալուց հետո վերանայեցի իմ հայ լինելը
18.06.2013
Մանկավարժական համալսարանի գրադարանի հումանիտար գրականության
ընթերցասրահն այսօր լեփ-լեցուն էր Արարատը պաշտող, նրա գագաթը գրավել
երազող բազմաթիվ
ուսանողներով. հարազատ բուհում հյուրընկալվել էր Գեղարվեստական կրթության
ֆակուլտետի շրջանավարտ, Արարատի գագաթը նվաճած լեռնագնաց Արթուր
Կարապետյանը:
Գրադարանի տնօրեն Տիգրան Պետրոսյանցը,
ներկայացնելով հյուրի անցած ուղին, հավաստիացրեց, որ բուհը հետևողական է
ու հպարտ իր շրջանավարտների մասնագիտական վերելքներով, առավել ևս՝
հայրենասիրական նվաճումներով: Տիգրան Պետրոսյանցն անդրադարձավ նաև Արթուր
Կարապետյանի՝ Ռուսաստանի հայկական համայնքներում հասարակական-քաղաքական
ակտիվ գործունեությանը, որը հայրենիքից հեռու ապրող մարդու հայրենասիրական
լավագույն դրսևորում է:
«Ամեն հայի համար իր
հայրենիքը կենսակերպ է, հանապազօրյա հաց և էներգիա: Յուրաքանչյուրը ոչ
միայն խոսքով, այլև վարքով պետք է պատասխանատվություն կրի իր հայրենիքի
համար»,- կարծում է Արթուր Կարապետյանը, ով չնայած հաճախակի է լինում
հայրենիքում, սակայն հասցնում է կարոտել հայրենի բնությունը:
Հանդիպման
ընթացքում Արթուր Կարապետյանը պատմեց Կոստյուշկոյի, Մակ-Կինլի,
Ակոնկագուա, Կիլիմանջարո, Էլբրուս, Վինսոն, Ջոմոլունգմա գագաթները նվաճելու
հետ կապված բազմաթիվ հուշեր, սակայն ամենից շատ հայրենասեր լեռնագնացի
հուշերում տպավորվել է Արարատի գագաթը բարձրանալը:
«Արշավը
սկսելու օրը թուրքական կողմը պատվիրակության անդամներից միայն ինձ
պարտադրեց «դատարկաձեռն» բարձրանալ գագաթ՝ որպես հսկիչ խմբի հետ ուղարկելով
ռազմական լեռնագնացներ: Հայրս լավաշ էր տվել՝ պատվիրելով այն հետս գագաթ
բարձրացնել, դնել քարերին ու նորից հետ բերել. խոստացել էի պիտի պատգամը
կատարեի: Ինչ գագաթ բարձրացել եմ, եռագույնը ծածանել եմ այնտեղ, բայց դրոշի
փոխարեն Արարատ ստիպված էի տանել Բայազետից գաղտագողի գնված երեք գույնի
սրբիչները…»,-հուզված և նաև մեծ հպարտությամբ պատմում է լեռնագնացն ու
ավելացնում՝ գագաթին օտարազգի մեր պատվիրակությունը հայկական կոնյակով խմեց
այն կանանց կենացը, ովքեր ծնել են դարեր շարունակ հայերին պատկանող
տարածքներն ազատագրած հայորդիներ:
Անդրադառնալով
բարձրություններ հաղթահարելու դժվարություններին՝ լեռնագնացն ընդգծեց՝ երբ
ոտք ես դնում գագաթ, անհետ կորում է գիտակցությունը՝ իր տեղը զիջելով
զգացմունքներին. համառությունը օգնում է, վստահությունը՝ խանգարում:
Հանդիպման
ընթացքում ցուցադրվեց նաև Արարատ բարձրանալու մասին ֆիլմն ու
լուսանկարներ. ի դեպ Արթուր Կարապետյանը նաև գեղանկարիչ է, ով բազմաթիվ
ցուցադրություններ է ունեցել աշխարի շուրջ 70 երկրների ճանաչված
ցուցասրահներում:
Սոցիալ-տնտեսական աշխարհագրության և աշխարհագրության ամբիոնի վարիչ Աշոտ
Աջամօղլյանը ուրախությամբ նշեց, որ հանդիպումը լավագույն առիթ էր
ներկաներին փոխանցելու Արթուր Կարապետյանի՝ որպես սեփական աչքերով Արարատը
տեսած մարդու տպավորություններն ու հայրենասիրությունը: Ամբիոնի
վարիչը ցանկություն հայտնեց ֆակուլտետին տրամադրել բազմաթիվ գագաթներ
հաղթահարած լեռնագնացի տեսագրություններն ու նյութերը՝ հետագայում դրանք
ուսումնական գործընթացում կիրառելու համար:
http://armspu.am/news/n/2030/ln/am
