ԳՐՔԵՐԻ ՆՎԻՐԱՏՎՈՒԹՅՈՒՆ
Գրքեր...
Հունիսի 26-ին Ֆինլանդիայի Օուլուի համալսարանի կրթության ֆակուլտետի պրակտիկայի բաժնի ղեկավար Վեսա-Մատտի Սարենիուսը շուրջ 40 կտոր գիրք նվիրեց ՀՊՄՀ-ի գիտական գրադարանին:
Մանկավարժականի ֆինն գործընկերոջ շնորհիվ բուհի գրադարանը համալրվեց օտարալեզու գրականությամբ՝ ժամանակակից գրողների հեղինակած կրթական և բնագիտամաթեմատիկական ուղղվածությամբ գրքերով, քննադատական մտածողության դասավանդմանն ու մաթեմատիկա դասավանդողների մասնագիտական զարգացմանն ուղղված գրականությամբ.«Երբ Օուլուում գործող երկու գրադարանները միավորվեցին, իսկ եղած գրքերը թվայնացվեցին, առաջին իսկ վայրկյանին որոշեցի որոշ գրքեր բերել Հայաստան, նվիրել Մանկավարժականին»,-գրքերը նվիրելիս ասաց Վեսա-Մատտի Սարենիուսն ու ավելացրեց նաև, որ խմբաքանակը հարստացրել է իր անձնական գրադարանի գրքերով:
ՀՊՄՀ-ի գիտական գրադարանի տնօրեն Տիգրան Պետրոսյանցը շնորհակալություն հայտնեց գրքերի համար և հույս հայտնեց, որ գրադարանի այցելուները կհաղթահարեն լեզվական անջրպետն ու կօգտվեն օտարալեզու գրականությունից: Գրադարանի տնօրենը ցանկություն հայտնեց, որպեսզի երկու բուհերի համագործակցության շրջանակում Ֆինլանդիայի Օուլուի համալսարանի գրադարանն ունենա հայագիտական բաժին:
|