159-ՐԴ ՀԱՆԴԻՊՈՒՄ
2016 թ-ի մայիսի 7-ին, շաբաթ օրը, Խաչատուր Աբովյանի անվան հայկական պետական մանկավարժական համալսարանի գիտական գրադարանի հումանիտար գրականության ընթերցասրահում տեղի ունեցավ «Չորեքշաբթի» գրական ակումբի 159–րդ հանդիպումը:
Տիգրան ՊետրոսՅանցը խոսեց ստեղծագործողի ազատ մտածողության, դաստիարակության ծիրում մարդու անձնական օրինակի կարևորության մասին: Թեմային անդրադարձ կատարեցին նաև Վարդան Գրիգորյանը, Մելսիդա Հակունցը, Սևակ Հովհաննիսյանը, Մարգարիտ Հովսեփյանը:
Հանդիպման «Ստեղծագործական ժամացույց» բաժնում իրենց նոր ստեղծագործությունները ներկայացրեցին Հմայակ Մկրտչյանը /«Վերջին մարդը», մշակված տարբերակ/, Մարգարիտ Հովսեփյանը /«Ելեք, հայեր»/, Ազնիվ Պետրոսյանը /չորս քառյակ/, Վարդան Գրիգորյանը /«Հարատևեք, տղերք»/, Արեվվան /Արփինե Լազարյան, «Երկու տող». վեցի հավաքական ստեղծագործություն/, Սյուզաննա Առաքելյանը /«Անվերնագիր»/, Հասմիկ Բաբաջանյանը /«Հայոց զինվորներին»/, Աննա Թադևոսյանը /«99 գրամ...», «Կանգնած ես»/, Զարուհին /«Հին օրեր նվագ», «9.30 րոպե», «Եվ դու, Ջոնի», «Իմ դեղձենի»,/, Մելսիդա Հակունցը /«Երազ», «Երանի չէ...»/, Մարիամ Գրիգորյանը /«Ապրիլ թե ապրել»/: Բոլոր ստեղծագործությունների շուրջ ծավալվեց օգտակար քննարկում:
Տիգրան ՊետրոսՅանցը էկրանի վրա ցուցադրեց «Չորեքշաբթի Գ» գրքի տարբերակը և հավաստիացրեց, որ բոլորի ցանկության դեպքում, մինչև օգոստոսի կեսերը այն կարելի է հրատարակել:
Հանդիպման «Մշակութային լուսանցք» բաժնում Տաթև Ենոքյանը և Հմայակ Մկրտչյանը մեկական ստեղծագործություն արտասանեցին Պարույր Սևակի գործերից: Հրաչյան /Հրաչյա-Ժորա Հակոբյան/, Հմայակ Մկրտչյանը, Տիգրանուհի Մարգարյանը, Մհեր Խեչոյանը, Տաթև Ենոքյանը, Մարգարիտ Հովսեփյանը՝ Սևակ Հովհաննիսյանի դաշնամուրային նվագակցությամբ, կատարեցին մեկ տասնյակից ավելի հայրենասիրական երգեր և հայերեն պարեցին:
Հանդիպումն ամփոփեց Տիգրան ՊետրոսՅանցը: |