ՄԱՅԻՍՅԱՆ ՀԵՐՈՍԱՄԱՐՏԵՐԻ ԱՐՁԱԳԱՆՔՆԵՐԸ
1918 թ-ի Մայիսյան հաղթանակների նախօրյակին Խաչատուր Աբովյանի անվան հայկական պետական մանկավարժական համալսարանի գիտական գրադարանի հումանիտար գրականության ընթերցասրահի ցուցահանդեսային պատին բացվել է «Մայիսյան հերոսամարտերի արձագանքները» գրքային ցուցահանդեսը:
Ներկայացված են Սարդարապատի, Ապարանի, Վանաձորի հերոսամարտերին նվիրված գրքերը և այդ հաղթանակների արդյունքում ստեղծված Հայաստանի Առաջին Հանրապետության ժամանակներին, գործիչներին նվիրված 150-ից ավելի գրքեր:
Առանձին դարակներով ներկայացված են Հանրապետության հիմնադիր Արամ Մանուկյանի, Անդրանիկ Զորավարի, Գարեգին Նժդեհի, Ռուբեն Տեր-Մինասյանի մասին պատմող, նրանց կողմից հեղինակած գրքերը, նրանց մասին հուշերը:
Ցուցադրվում են պատմաբաններ Հարություն Թուրշյանի, Ռիչարդ Հովհաննիսյանի, Հրաչիկ Սիմոնյանի, Համլետ Գևորգյանի, Վանիկ Վիրաբյանի, Արմեն Ասրյանի, Գեղամ Կիրակոսյանի, Տիգրան ՊետրոսՅանցի և ուրիշների գրքերը: Ցուցադրության կազմակերպման ընթացքում ցուցափեղկում ավելացավ Վանիկ Վիրաբյանի օրերս տպագրված «Հայաստանի Հանրապետության պետական անվտանգության համակարգի ստեղծումը և գործունեությունը 1918-1920 թթ.» ծավալուն աշխատությունը:
Գիտական գրքերի հետ ներկայացված են հայ գրողներ Զարզանդ Դարյանի /«Քառուղիներ»/, Սերո Խանզադյանի /«Խոսեք Հայաստանի լեռներ»/, Հարություն Մկրտչյանի /«Անհայտ զինվորի հիշատակարանը»/ և այլ գրողների ժամանակաշրջանին նվիրված գեղարվեստական գրքեր: |