18:14, 17 Օգոստոս, 2011
ԵՐԵՎԱՆ, 17 ՕԳՈՍՏՈՍԻ, ԱՐՄԵՆՊՐԵՍ: Այս տարվա օգոստոսի 2-17-ը Խաչատուր
Աբովյանի անվան հայկական պետական մանկավարժական համալսարանում անցկացվեցին
ՀՀ կառավարության կողմից հաստատված 16 ավագ դպրոցների ուսուցիչների
որակավորման բարձրացման դասընթացներ:
ՀՀ մարզերի եւ Երեւանի ավագ դպրոցների 178 ուսուցիչներ այսօր ստացան
իրենց հավաստագրերը: ՀՀ կրթության եւ գիտության փոխնախարար Մանուկ
Մկրտչյանի տեղեկացմամբ' որակավորման բարձրացման դասընթացները վարել են 43
դասախոսներ' Խ. Աբովյանի անվան ՀՊՄՀ-ից, Երեւանի պետական համալսարանից,
Երեւանի պետական բժշկական համալսարանից, Հայ-ռուսական (Սլավոնական)
համալսարանից, Կրթության եւ գիտության նախարարության Կրթության ազգային
ինստիտուտից, Գնահատման եւ թեստավորման կենտրոնից: «Որակավորման բարձրացման
դասընթացներին ընդգրկվել են հանրապետության առաջատար մասնագետներ, ովքեր
այդ բնագավառում ունեն երկարամյա փորձ. ավագ դպրոցի դասագրքերի, ծրագրերի,
ուսումնական ձեռնարկների հեղինակ են, մասնակցել են նախորդ որակավորման
բարձրացման դասընթացներին»,- ասաց Մ. Մկրտչյանը:
Նշենք, որ ավագ դպրոցների ուսուցիչների հավաստագրերի պաշտոնական հանձման
արարողությանը ներկա էին նաեւ ՀՊՄՀ ռեկտոր Ռուբեն Միրզախանյանը, ԿԳՆ ԾԻԳ-ի
տնօրեն Հայկ Մաղաքյանը, այլք: